Ulan sa Kalagitnaan ng Abril

Hindi gaya mo, hindi ako masyadong nasasabik

sa unang ulan ng Mayo

kung nasa probinsiya ako’t bumuhos ito

hindi ako nagagaya sa mga nagsasahod ng planggana

sa halip, uupo lang ako sa tabing bintana

pakikinggan ang sa umpisa’y madalang ngunit malalaking patak na ulan

mga bignay na nalalaglag sa bubungan.

Hindi naman ako takot sa alimuom o sa asidong ulan

payak lang talaga ang ganda sa akin ng unang ulan ng Mayo

gaya ng Tatlong Maria, ng kabilugan ng buwan

ng bukang-liwayway.

Sapagkat itong unang ulan ng Mayo

lumilitaw lang pag wala na halos lakas

lulupiging tag-araw.

Mas iniibig ko ang ulan sa kalagitnaan ng Abril

tulad ng Halleys comet, ng dapit-hapon
ng Aurora Borealis.

Sapagkat itong ulan sa kalagitnaan ng Abril

dumarating sa kasibulan ng tag-init

makikipagbuno, makikipagpatatagan

susugal hanggang sa huling patak ng ulan.

Mas gusto ko itong ulan sa kalagitnaan ng Abril

dahil sa mundo, ako, tulad mo, madalas

ulan sa kalagitnaan ng Mayo.