Power Trip

Nagulat ka sa sanlaksang pulang langgam

na nagkukumpulan

sa itinapon mo kaninang tira

sa mamahaling tsitsirya.

Maligalig sila.

Maliliksi, masaya.

Nagkabituin ang iyong mga mata.

Dali mong kinuha

ang makunat nang piraso,

at nilunod

sa bunganga ng inodoro.

Natanong mo ang sarili, pagkatapos.

Matapos titigan

ang nagtititigok na mga langgam.

Ano nga ba ang napala mo

kumpara sa buhay

ng sangkaterbang insekto?

Panibugho

May natutulog na insekto

sa ating pinakaloob

na kung nagigising

ay nag-aalburuto.

Panay ang lipad

at kay likut-likot.

Kung gayon tayo dinadalaw

ng kakaibang lungkot,

hindi makatulog

o kung makatulog ma’y

sa sama ng loob.

May nagpayo sa aking

ingatang huwag magising

ang insekto.

At ang sagot ko,

“Papaano ba iiwasan

ang pag-ibig sa ibang tao?”