Libingan: Tanging Makapaglalayo

Hindi kayang pagbawalan

ng pagdami ng tagyawat

sa mga gabi ng pagpapakapuyat

aking kamay sa pagsulat.

Hindi kayang agawin

ng nagligid na mga gawain

mga sandali ng pakikipagniig

sa ball pen at papel.

Hindi sasapat

maging ang mga paratang,

pangungutya't panunungayaw

upang sawayin kong

aking mga kamay

sa pagkatha ng tula.

Hindi uubra

maging pangmamata

ng mga kritiko

upang abandunahin ko

nagbiting mga banghay

 sa kisame ng aking kuwarto.

Hindi rin kaya

maging ng bigwas ng pangangailangan

at sumbat

ng humahagulgol na bituka

at bulsang uhaw

sa kalansing ng pera

na pigilin

aking mga mata't tenga

na humanap ng maisusulat.

Tanging libingan lang, natitiyak ko

libingang hindi matatakasan ninoman

libingang kumikitil sa bawat paghinga

makapaglalayo sa akin

sa pagsulat.

Kailan Pa?

Tama, hindi nga kayang

paghilumin ng tao
sarili niyang sugat.

Tama, panahon nga ang maestro

ng tao sa paglimot.

Mga minuto, oras at araw nga siguro

gumagamot, lumalanggas

sa nagngangang mga sugat

naglangib na mga galos

nagmantsang mga peklat.

Ngunit kailan, sabihin mo

kailan pa ibubuhos

kulay kalawang na betadine

ng mga di napapagod, di hinihingal

na mga kamay ng orasan

sa kumikirot pa ring sugat?

Kailan pa bebendahan

ng mga takipsilim at madaling-araw

malalim pa ring hiwa?

At kailan pa magiging peklat

sariwa pa ring sugat

nang malagyan na ng sebo de macho

ng mga nalagas na dahon

ng kalendaryo?

Sabihin mo, kailan,

kailan kita malilimutan?

Sitenta Pesos

Ikalabing-siyam ng Agosto, Biyernes

Masigla ang aking mga hakbang,
kulang na nga lang,
wumasiwas maging mga kamay
habang tinatahak
maliwanag at naka-tiles na daan
tungo sa de-aircong
acconting office.


"Sir, o,"
iniabot ng accountant ang sahod ko,
nakasobre, binilang ko,
apat na libo.

"Thanks," sabi ko,
at kasabay ng pag-usal ng pasasalamat
sa kakarampot na pera
muli kong naramdaman
pananakit, pangangati
ng aking lalamunan.
Naroon pa rin ang pamamalat

supling ng araw-araw

na pagtuturo sa mga mag-aaral

na di naman nag-aaral

at pananaway

sa mga kolehiyong hayskul.

Labing-isang seksiyon hawak ko,

kada-isa, halos limampung ulo,
at ang suweldo,

sitenta pesos kada-oras.

Pagdating ko ng faculty room

narinig ko'ng balita

sa malaking telebisyon:

"Magtataas pong muli

ang presyo ng gasolina

ng piso kada litro

ayon sa..."

Napakuyom ang kamay ko

at nalukot

ang nakasobreng

apat na libong suweldo.