Sa Bumuo ng Konsepto ng Maganda’t Guwapo

Ikaw—kung sino ka man

na bumuo ng konsepto

ng guwapo’t maganda

kinamumuhian kita.

Kinamumuhian kita

gaya ng pagkamuhi ng babae

sa lalaking

gumahasa sa kanya

ng dayukdok pa ring manggagawa

sa kurakot, mandarambong na politiko

ng isang ina

sa kabit ng kanyang asawa

ng pulubi

sa walang kuwentang lipunan

higit sa pagkamuhi ng tsuper

sa tumatangkad na presyo ng gasolina.

Ikaw—kung sino ka man

na bumuo ng konsepto
ng maganda't guwapo
magtago ka na
dahil malaki'ng kasalanan mo sa mundo.

Ikaw—kung sino ka man

na bumuo ng konsepto
ng maganda't guwapo

hindi mo alam—pero sana

malaman mo

kung ilan ang tumandang binata’t dalaga

kung ilan ang piniling magmukmok na lang

sa kani-kanilang kuwarto

kaysa maglamyerda sa kalsada

kung ilan ang napapakukuyom ng kamao

pag humaharap sa salamin

kung ilan ang nabuhay

na puno ng kaapihan

kung ilan ang nagtangkang

magpakamatay

nang dahil sa konsepto mo

ng maganda’t guwapo.

Sayang at hindi mo na nakikita

naging buhay ng iba

na pinalad maging guwapo’t maganda,

kung paano sila nagmayabang sa kani-kanilang sarili

na para bang gamit ang mukha

marami silang kayang gawin,

ni naririnig

walang hanggang pagpapakumbaba—kung pagpapakumbaba

man iyong matatawag at di kawalang tiwala’t

padurusa’t, kawalang kasiyahan

ng mga di umabot

sa itinakda mong

konsepto ng kagandahan.