Makapal na Salamin

Masyado mong pinakaisip

kanyang sasabihin

pag humingi ka ng paumanhin

at humiling

na muli siyang makapiling.

Ngayon, natatanaw mo siya

ngunit hindi ka na niya nakikita.

At alam mo, sa kaibuturan ng iyong pagkatao
kahit paanong sigaw, hiyaw

iyong gawin

hindi ka na niya maririnig.
Ngunit humihiling ka pa rin
sana, sana kahit ngayon man lamang
marinig niya
iyong sasabihin.

Ngunit paano, paano niya pa maririnig

e may takip na’ng bulak

magkabila niyang tenga?

Paano mo pa sa kanya ipasisilip

tamis ng pag-ibig

sa iyong mga labi

e mga mata niya’y

ganap nang nakapikit?

Paano mo pa ngayon ipararating

pagsisisi’t hinanakit

e may makapal nang salaming

sa inyo’y nakapamagitan?

Ipinikit mo

iyong mga mata

at gumapang, gumuhit

sa nagdadalamhating pisngi

katibayan ng panghihinayang, pagsisisi.

Ngunit hindi iyon umabot sa kanyang labi

pagkat hinarang ng makapal na salamin.