Ilayo niyo ako
sa pook na ito
itakas sa mga titig at sulyap
ng kasalukuyan
at sa nakasalubong na palad
ng nakangiting bukas.
At pag hindi na nila tayo
nasusundan
dalhin niyo ako kahit saan
kahit hindi na roon
sa mga palasyo’t mga kuwartong
nakikita ko lang
sa pagyayakapan
ng aking mga pilik-mata
ng aking mga pilik-mata
basta doon
sa hindi ko makikita
pagsikat at paglubog ng araw
sa lugar na hindi ko maririnig
mga yabag
ng mga paa ng orasan.
Huwag kayong mapapagod
na samahan akong
humanap ng lunas
sa mga daang hindi natin kilala.
At kung sakaling abutan nila tayo
magyakap lang kayong dalawa’t
sasagupain ko ang dilim.
Walang komento:
Mag-post ng isang Komento