Kambiyo lang ang pagitan namin ng tsuper
at binabasag ng wiper ang mga gumagapang
na tubig
sa hinilamusang pisngi ng windshield.
Kumulog, kumidlat
bumagsak ang liwanag.
Pinagyakap ko’ng aking mga pilik-mata
nakita ko tayong dalawa
nakasakay sa bus, magkahawak-kamay
samantalang nakasandal ka sa aking
balikat
at dinidisiplina ang lupa ng ulan.
Kumulog, hindi ko alam kung kumidlat
hindi ko nakita kung may gumuhit na
liwanag.
Pinaglayo ko’ng aking mga pilik-mata
nakita kitang nakahawak sa namimilog
mong tiyan
akbay-akbay ng lalaking iyong
nakainuman.
At binasag ng aking pilik-mata
ang gumapang na tubig
bago umabot sa nilalanggas pang pisngi.
Walang komento:
Mag-post ng isang Komento