Balita

Ayoko na pong

manuod ng balita.

Ayoko nang makinig
ng radyo.

Ayoko nang magbuklat

ng d'yaryo.

Ayoko nang magbukas

ng tv.

Sawang-sawa na kasi 'ko

sa mga nangyayari,

sa korapsyong sasambulat

uukilkilin, lilitisin

tatangayin ng hangin

sa mga pulis na kriminal

sa pagtaas

ng presyo

ng kuryente, bigas,

pamasahe't petrolyo.

Sukang-suka na 'ko

sa damuhong k'wento

ng maaarteng artista

sa tsismisang walang k'wenta.

Sabihin n'yo na lang po

sa akin

pag natuldukan na

kinakalawang na sistema

pag masa na nasa tuktok

ng tatsulok

tiyak, nagkukumahog

manunuod ako ng balita.