Paghahanap

Sa ganitong panahon

dapat, nakangiti ako

dinarama ang kapayapaan

ng kaluluwa

kiliti ng lamig

at tahimik na himig

ng ulan

habang nagkakape

at pinanonood

ang lumulusog na baha

o nagbabasa

at kayakap ng unan.

Ngunit saan ko

hahanapin ang saya

kung alam kong

habang hinahanap ko ang sarili

ay laksa

ang nasa palad ng baha

naghahanap ng pag-asa.

Elevator*

Akyat-baba

baba-taas

sara-bukas

ganito mo hinihintay

ang pagtungtong ng alas-singko.

Bahagi ng paghihintay

ang pag-idlip ng oras

pagpapang-abot

ng iyong mga hikab

pagbilis

ng pagpapalit ng pahina

ng karamay mong

gusgusing romance pocketbook.

At sa pagitan ng mga ito

ilang ulit mo ring sisilipin

ang katuturan

ng papanaw na araw.

*para kay ate na operator ng elevator sa FEU-EAC.

'Tol

Hindi ko na sinubok suriin

ang pagkadalisay

ng iyong mga ngiti

ni pinakinggang mabuti

kung ano ang dala

ng sadyang inilalakas na tawa.

Hindi ko kaya.

Lalong hindi ako umiling

nang muli mong kawayan ang waiter

para sa ilang fried chicken

at panibagong bucket.

Maaga pa

may bukas pa

para sa nagkalat

na papel sa mesa.

Alam ko

mamaya, sa apartment mo

muli kang dadalawin

ng tinatakasan mong multo.

Buhol

Buhul-buhol ang maputlang usok

na ibinuga

ng makinis na dalagita

lumabo sa aking mata

ang maladiwata niyang ganda.

Endearment

Kailangan natin ng bagong pangalan

sa sandaling pumasok tayo

sa relasyong tulad nito:

Sweetheart, Honey, Dear

Mahal, Darling, Bebe Ko.

Kailangan natin ng bagong pangalan

iba sa ngalang kinagisnan

iba sa nakasanayan

‘pagkat sa harap

ng kasintahan

iba ang ating katauhan.

Tahanan

“Kung nasaan ang taong nag-iisip sa iyo, naroon ang tahanan mo.”—Naruto

Tahan na…

               tama na…

                             tahan na…

                                                                      TAHANAN

                                                                       

dito

dito ka hihinto sa pag-iyak

hindi na magsasayang ng luha

dahil kapiling

ang mga taong nagmamahal

                                                                                                                                    kumakalinga

Pag(-)Ibig

Pag                        pangatnig

ibig sabihin            kung                     tuwing

                                            sakali

ibig                         salitang-ugat

kahulugan              nais                    hangad

                                             gusto

kung gusto?

                           kung hangad?

                                                       kung nais?

                                                                              kung ibig?

dapat                           handang masaktan

                                                                 pagpawisan

                                                                                        lumaban

 papaano kung hindi?

                                   kung ayaw?

                                                                 walang paghahangad

                                                                                        walang pagkagusto

                                                                                                                 walang pagnanais

walang pag-ibig?