Sa lahat ng kilala kong nilalang
siya ang
pinakamatapat
isa sa
pinakakapaki-pakinabang
at pinakamatapang.
Babala ang buong-buo niyang mga
kahol
sa pagdating ng
isang kaaway o bisita
o sa pagpasok ng
isang nakabibiglang pangyayari
pagbagsak ng buko sa
bubong halimbawa
o pagtalon sa mesa
ng malaking pusa.
Kung pinasok kayo ng
magnanakaw
buong tapang magliligtas
at mag-aalay ng buhay.
Nakakikilala siya hindi lang ng panginoon
kundi maging ng dusa at saya
didilaan ka’t lalambingin
kung tinatakasan na ng pag-asa.
Kaya talagang panalo ka sa kanyang katapatan
na sinusuklian mo
lang naman
ng paghimas sa kanyang ulo
ng pag-aalis ng garapata
ng malambing na
pagsambit sa kanyang ngalan
ng kaning-lamig,
tirang sabaw, mga pinagsimian.
Meron din daw siyang napakatalas
na pandama
na hindi pa yata nahahalata ang iyong
plano
na bukas-makalawa
gagawin mo siyang
pulutang adobo
sukli sa buong
katapatan niyang paglilingkod
sa itinuring niyang paraiso.
Walang komento:
Mag-post ng isang Komento