Libing

Nakablusang puti si Ma’am Rose, dean ng College of Accountancy, nakapayong na itim, naka-shades, may tangang polka dots na panyo.

Sa tantiya niya, mga limang dipa lang ang layo niya sa karo. Hindi niya magawang makidalamhati sa pamilya, dahil ni hindi naman niya kilala ang namatay, ni hindi rin niya kabiruan ang namatayan— si Ma’m Modrone, isa sa kanyang mga faculty member. Kaya napagpasyahan niyang maglakad na lamang, bilang pakikihati sa hirap. Pinauna na niya sa bahay si Mang Greg. Magta-taxi na lang siya pag-uwi.

Nang ipinapasok na sa nitso ang kabaong, panay ang iyak ng mga namatayan. May dalawang hinimatay, may isang nagwawala. Dinukot ni Ma’am Rose sa shoulder bag niya ang cell phone niya. May limang missed call at tatlong text message.

Si Glenn, pamangkin niya. Auntie bt d nyu sagot ang fone? Nacardiac arrest c dad, wla na xa.

Napahagulgol siya. Hinimas siya sa likod ng katabi niyang babae.

“Ganyan po talaga ang buhay.”

Umihip ang hangin, nagsayawan sa ere ang mga dahon ng akasya.