Antolohiya*

Gabing walang imik,

kinuha ko sa salansanan

ang isang inaalikabok na aklat,

                                                      antolohiya ng mga tula.

Nagbasa ako ng tatlong akda.

                      tungkol sa pag-ibig

           tungkol sa pag-ibig

                                   tungkol sa pag-ibig

Sa bawat isang matatapos

tahimik kong naririnig

unti-unti

gumuguhit

ang isang himig.

Pinupunit ang gabing walang imik.

Sarili kong tinig.

*pasintabi sa tulang ‘Tatlong Hiling’ ni Romulo Baquiran, na may linyang ‘pag-ibig, pag-ibig, pag-ibig.’