Kalsada

Isang Dosenang Haiku

1

Ngumisi’ng dilim—

nanlisik, mga mata

ng avenida.

2

Nagmamadali.

Mga ilaw sa enleks

ay Halley’s comet.

3

Nagsuka’ng lasing

sa poste, nagulantang

bahay ng langgam.

4

Tambol ng dibdib…

huminga ka’t… nanghablot…

silver na k’wintas.

5

Bida’y dumating,

matutulis na tsismis,

naging pagbati.

6

Ula’y bumuhos,

namuti ang kalsada,

kotse’y natakot.

7

Mata ng barker,

biglang kumislap, nang may

dyip na dumungaw.

8

Ngumiti’ng dilim.

Papauwing dalaga,

niyakap ang bag.

9

Tulalang kuting,

Kumaripas. Dumaa’y

‘sang dagang kanal.

10

Batang madungis,

sumayaw sa kalsada.

Tugtog, busina.

11

Nilagyan ng tres.

Hubad-barong gusgusin,

tulala pa rin.

12

Damo sa enleks,

kumakaway sa mga

bus na paalis.