Rubber Shoes

Muli kong dinaanan

ang naibigang

mamahaling sapatos.

Kayganda nang pagkaasul,

mapagmayabang na suwelas

at sintas.

Sa pagitan namin,

naroon pa rin,

ang malinaw

at makapal na Salamin.

Wish List

Labing-walong araw na lang,

Pasko na.

Saglit kang pumikit,

sa isang bond paper

sa isip,

isinulat ang mga numero.

Isa hanggang labing-walo.

Katapat

ang gabi-gabing hiling,

Makapagpatuloy

sa kolehiyo.

Iniipon Ko ang Luha ng mga Kandila

Tulad nang gawain

noong musmos pa,

panlaban sa pagkabagot, iniipon ko

ang luha

ng mga kandila.

May puti, may dilaw,

may pink, pula

bahaghari at bughaw.

Kinikinis

ng istik ng ice drop.

Pinapatag, pilit

binibilog, dinadalisay

ang hugis.

Ngayon, kininis ko ito

ng palad ko’t mga daliri

dinarama

ang kirot

at hapdi ng init.

Habang naluluha’t

pasulyap-sulyap

sa ngalan mong

katititik lang

sa lapida.

Unang Undas

Ito ang unang Undas

na di ka namin

kapiling.

Mahirap pa ring paniwalaan

ang lahat,

na di ka na mayayakap

di na makakausap

di maririnig ang halakhak.

Mahirap pa ring paniwalaang

di na mamamasdan

ang kislap

sa tahimik mong mga titig

sa sandaling maabot

ang mga minithi.

Ito ang unang Undas

na ikaw

ang aming binisita.

At heto kami, Ama,

nakamata

sa lumuluhang mga kandila.

Pamamaalam

Nang lumapat

ang kabaong

sa lupa,

lumakas ang mga iyak,

may narinig kang tunog

o tinig

o himig.

Noon mo lang iyon narinig.

Nangingilid ang luha,

ibinulong mo sa puting rosas

ang di nasabing pag-ibig.

Backpack

Alas-s’yete’t siksikan:

may nakatayong lola,

pasan-pasan kong backpack,

bigla na lang bumigat.

Paglalakbay sa Siyudad

1

Nagpula’ng ilaw,

nagugutom na tsuper,

muling naghikab.

2

S’ya ay lumipad.

Ngunit treng walang laman,

dumiretso lang.

3

Gutom na’t pagod,

napasandal, nalanghap,

usok ng lungsod.

4

Sales leyding hapo,

wala uling masakyan.

Tayo na naman.

5

Hay! Naupo nga,

sa sobra namang sikip,

di rin maidlip.

6

Himbing nang tulog…

namreno bigla ang bus…

ginulat nang untog.

7

Dami nang pera,

rumagasang busina,

napapikit s’ya.

8

Tsabi’ng babae.

Nakaupong lalaki,

daling pumikit.

9

‘Sang linggo na lang,

mae-endo na, sa bus,

di na nagbayad.

10

Himbing na himbing,

nang magising, lampas

na sa babaan.

11

Tayo na naman.

Kaya di nakonsens’yang

di na magbayad.

12

Nagtatawanan,

ang init na’t siksikan,

di namalayan.