Kalapati

Binubunot ang iyong mga bagwis

o pinoposasan ng masking tape,

para sa paghilom ng mga sugat

sanay ka na sa ipinagpipilitang tahanan.

Ibon kang matayog ang lipad

ngunit kakatwa ang makita kang

ilahas*

at sapagkat malungkot marahil

sa mga paris mo ang walang kapiling,

madali kang nabibihag

ng bilanggong mga kauri.

Inililigaw ka sa malalayong lugar

pawawalan, panunuoring pumaimbulog

magpaikut-ikot

habang hinahanap ang tahanan

sa utos ng umaalingangaw na mga palakpak.

Bigyang-galak ang panginoong

pinagkakautangan.

Sa kasalan, madalas kang kasangkapan

sagisag ng sagradong mga bagay

bilanggo sa hawla

sa buong tagal ng paghahanda’t pagdiriwang.

Kaya’t inip na inip kahit pa may kapiling.

Sa gitna ng kasiyahan,

bigla kang pawawalan.

Saka lilipad nang kay tulin

pilit tutuparin ang tungkuling magbalik.

At samantalang masiglang

pumapayagpag sa kalawakan,

sasambitin ng makakamalas:

“Hayun! Hayun ang ibong sagisag ng kalayaan!”

*nangangahulugang nabubuhay sa kadawagan at mahirap alagaan