Ekis

Minamarkahan ng ekis

ang natatapos

na relasyon.

Makapal na linyang

nagiging harang

pumapagitan

sa iyo

at sa pinagsamahan

sa ulong nakasandig sa balikat

sa kumikislap na mga mata.

sa matamis na tawagan

sa napakagaang pakiramdam.

Alam mong

hindi ka na makakakabila

makatatawid

sa apat na siwang

ng ekis.

Magtitiyaga na lang

sa pagsilip.

Habang sa dibdib

anong kirot

itong pumipintig.

Tuwing May Tumutubong Kalungkutan sa Aking Bakuran

May tumubong halaman

sa aking bakuran.

Sa lapad at kulay

ng dahon,

ng tangkay,

sa salimuot ng ugat,

alam kong

ito’y Kalungkutan.

At tulad nang dati,

gaya ng mga nauna,

akin itong aalagaan.

Nakahihina ang kanyang

hininga,

di tulad ng sa Saya,

nakasisikip sa dibdib,

tulad ng sa Inggit,

tulad ng sa Galit.

Ngunit hindi ko ito bubunutin.

Akin itong aalagaan,

dadamuhan,

didiligan,

kukuwentuhan.

Pahihintulutang magmay-ari ng lupa

ang mga ugat.

Sapagkat sa panahong

ito’y maging puno,

mamumunga ito

ng napakaraming pahina.

Isa-isa kong pipitasin,

kakainin.

Titibay ang aking dibdib

at lilinaw

ang mga tanawin.

Puto Bumbong

Matagal ko nang gustong

kumain ng puto-bumbong.

Tuklasin ang lasa

ang kombinasyon ng malagkit at niyog

basagin ang tamis at amoy

na matagal nang naglalaro sa imahinasyon.

Isang gabi ng Disyembre

maginaw

nandoon tayo sa parke.

Naglipana ang mga nagtitinda

makulay ang paligid

ang mga parol at Christmas light

hindi nagpapasindak sa gabi.

Yakap-yakap ka ng dilaw na dyaket

una kong regalo sa iyo

nasa iyong mga ngiti at titig

ang sigasig

na ipaglaban itong ating pag-ibig.

Ramdam ko sa gabi

ang tamis ng pagmamahalan

may naririnig akong himig

gusto kitang yakapin

halikan.

Hindi ako ang nauna sa lahat.

Sa halik. Sa yakap.

Sa halik at yakap.

Ngunit ang malamang

ito rin ang unang

tikim mo nitong lilang kakanin

ay alaalang payak

na itatanim ko sa dibdib

aalagaan

paulit-ulit na babalikan.

Si Vhong Navarro at ang Nagbabagang Balita

Umuusok sa telebisyon

ang panggagahasa umano

ni Vhong Navarro.

Lamog na kamatis ang mukha

lumulukso ang luha.

Nagbabaga.

Nagliliyab sa mata ng tao.

Mainit na usapan

sa mga opisina at kanto.

Kasabay nito

maraming illegal settler

ang winasak ang tahanan.

Di man lang

napaso ang bayan.

Mula sa Kaibigang Makata

Kilala niya ang mga haligi

ng aming relasyon

nasa talinghaga

ang kanyang mga payo’t opinyon.

Magpatuloy sa paghakbang, mahaba na ang nilakbay.

Alam niya ang ilang ulit naming

hiwalay-balikan

ang mga taon sa pagitan

ang kirot sa mga patlang

ang takot

ang lungkot.

Isiniwalat ng kilos ko at salaysay

ang lahat

ang lahat-lahat

kaya nauunawaan niya ang salimuot

nakikita ang mga gusot

nasisilip ang tinatakpang kirot.

Mabigat sa dibdib itong

hiwalayan kahapon.

Parang iba ang lahat.

Sa dibdib ko

may kung anong mabigat.

At sabi niya

Baka iyan na ang huling kabit sa inyo ng tadhana.

Naging kamay marahil

ang salitang huli

nadama kong kinurot

ang aking dibdib.