Tungkol sa Natabunang Talinghaga

Kadalasan, ganito iyon.

Darating nang biglaan

ang Talinghaga.

Mabilis.

Walang iginagalang na pagkakataon,

pook,

emosyon.

Maaaring nasa kalagitnaan ako ng paliligo,

pagkakape,

pakikipag-agawan sa sasakyan,

kuwentuhan,

pagdarasal.

Sa nakapalibot sa aking trabaho,

itatabi ko muna ito.

Mapapatungan ng minamadaling grades,

inaasikasong exam

o lesson plan.

Hanggang may dumating na naman,

at malagay sa ibabaw.

Tataas ang salansan

ng kung anu-anong hindi nais

subalit kailangang tapusin,

matatabunan

ang Talinghaga.

Kaya magmamadali ako,

magkukumahog.

Nang mailigtas ito

at hindi masayang.

Pagkaalis na pagkaalis

ng kung anu-anong nakadagan,

magugulat ako,

matutulala.

Sapagkat sahig na lamang

ang masisilayan.