Turon*

Ito lang siguro ang kaya mo

tindang malulutong na turon

para sa nangangatog

gutom na gutom

na mga nasalanta.

Siguro, sinalubong ka

ng mapupungay nilang mata.

Sinabi sa iyo ng matatanda

“Gagantihan ka ng Lumikha.”

Isinigaw ng mga palabiro

“Hindi lang saging ang may puso!”

Sa pagtulog mo

siguro, ihahatid ka ng lamig

at marikit mong ngiti

sa pinakamatamis na panaginip,

at sana, roon

may magbulong sa iyo nito

“May lumayang Pilipino

nang bumukas ang palad mo.”

* para sa Pilipinong nagbigay ng tindang turon sa mga nasalanta ng bagyong Maring at ng habagat.